दहशतवाद्यांच्या हल्ल्यात पुण्यातील उद्योजक कोस्तुभ गणबोटे यांचे दुःखद निधन
गणबोटे फरसाणचे मालक व सामाजिक कार्यकर्ते होते कोस्तुभ गणबोटे; पहलगाम (जम्मू-काश्मीर) येथे हल्ल्यात जीव गमावला
पुणे / पहलगाम (जम्मू-काश्मीर) – पहलगाम येथे काल झालेल्या दहशतवादी हल्ल्यात पुण्यातील गणबोटे फरसाणचे मालक श्री. कोस्तुभ गणबोटे यांचे दुर्दैवी निधन झाले. सामाजिक कार्यात नेहमी पुढाकार घेणारे, विविध उपक्रमांना साथ देणारे आणि समाजाशी आपुलकीने जोडले गेलेले हे व्यक्तिमत्त्व अशा अमानुष हिंसेत गमावल्याची हळहळ समाजात व्यक्त केली जात आहे.
गणबोटे हे रस्ता पेठ, पुणे-११ येथील रहिवासी असून, त्यांच्या निधनाने परिसरातील व समाजातील सर्वसामान्य नागरिकांमध्ये दुःखाची लाट पसरली आहे. त्यांच्या कुटुंबियांमध्ये पत्नी, दोन मुले आणि इतर आप्तस्वकीय आहेत.
“Positive Watch” परिवार, नामदेव शिंपी समाज युवक संघ – महाराष्ट्र आणि सामाजिक कार्यकर्ते यांच्यातर्फे त्यांच्या आत्म्यास शांती लाभो आणि कुटुंबियांना या कठीण प्रसंगातून सावरण्याची ताकद लाभो, अशी श्रद्धांजली अर्पण करण्यात आली आहे.
या हल्ल्याचा तीव्र निषेध व्यक्त करण्यात आला असून, देशातील शांततेला बाधा निर्माण करणाऱ्या अशा अमानुष घटनांवर सरकारने आणि यंत्रणांनी कठोर कारवाई करावी, अशी एकमुखी मागणीही करण्यात आली आहे.
POSITIVE WATCH आणि Positive Watch Youth Association च्या वतीने संपादकीय भूमिका
जम्मू-काश्मीरमधील पहलगाम येथे झालेला दहशतवादी हल्ला हा फक्त एका व्यक्तीचा नव्हे, तर संपूर्ण देशाच्या शांततेवर झालेला घात आहे. अशा हल्ल्यांमधून निष्पाप नागरिकांचे प्राण जात आहेत, हे अत्यंत वेदनादायक आहे. POSITIVE WATCH व Youth Association तर्फे या हल्ल्याचा तीव्र निषेध करण्यात येतो. सरकारने केवळ निंदा न करता, कठोर आणि परिणामकारक कारवाई केली पाहिजे, ही वेळेची गरज आहे. देशाच्या अंतर्गत सुरक्षेसोबतच, सामान्य नागरिकांचे प्राण व प्रतिष्ठा जपण्यासाठी दीर्घकालीन ठोस धोरणे आणि त्वरित कृती आवश्यक आहे. शहीद झालेल्या सर्वांना आमची भावपूर्ण श्रद्धांजली, आणि त्यांच्या कुटुंबीयांच्या दुःखात आम्ही सहभागी आहोत.