चिपळूण नागरी सहकारी पतसंस्थेने आर्थिक वर्ष २०२२-२३ मध्ये निश्चीत केलेली उद्दिष्ट पूर्ण…
चिपळूण (प्रतिनिधी) – चिपळूण नागरी सहकारी पतसंस्थेने आर्थिक वर्ष २०२२-२३ मध्ये निश्चीत केलेली उद्दिष्ट पूर्ण केल्याने दि. २३ एप्रिल २०२३ रोजी संकल्पपुर्ती आनंद मेळाव्याचे आयोजन संस्थेच्या बहादुरशेखनाका चिपळूण येथील सहकार भवन मध्ये सकाळी ठिक १०.३० वाजता घेण्यात येणार आहे. या मेळाव्याला निवृत्त अप्पर आयुक्त तथा सहसचिव सहकार व पणन वस्त्रोदयोग मंत्रालय, मुंबई एस. बी. पाटील व जिल्हा उपनिबंधक सह संस्था, रत्नागिरी डॉ. सोपान शिंदे आदी उपस्थित राहणार आहेत. ही यशस्वी वाटचाल संस्थापक अध्यक्ष सुभाषराव चव्हाण यांच्या मार्गदर्शनाखाली सुरू असल्याची माहिती मुख्य कार्यकारी अधिकारी सौ. स्वप्ना यादव यांनी दिली.
|
चिपळूण नागरी सहकारी पतसंस्थेच्या ३० वर्षाच्या कालखंडात ‘आपली माणसं आपली संस्था’ या ब्रीदवाक प्रमाणे गरजूंना तात्काळ कर्ज पुरवठा, सभासदांना ठेवीवर व्याजदर, शेती पूरक दुग्ध व्यवसायांसाठी शेतकऱ्यांना कर्ज पुरवठा यातून संस्थेने शेतकरी असो अथवा सुशिक्षित बेरोजगार असो या सर्वांना स्वावलंबी बनवण्यात हातभार लावला आहे. तसेच कोरोना काळात मुख्यमंत्री सहाय्यता निधीत १ कोटी रुपयांची मदत अथवा महापुरात चिपळूण नागरी सहकारी पतसंस्थेने पूरग्रस्त सभासदांना मदतीचा हातभार दिला. संस्थेने आर्थिक व्यवहार संभाळताना सामाजिक बांधिलकी जोपासली आहे. तर दुसरीकडे स्वातंत्र्याच्या अमृत महोत्सव अंतर्गत हर घर तिरंगा या उपक्रमात चिपळूण नागरी पतसंस्थेने सहभाग दर्शवत १५ ऑगस्ट रोजी सर्व शाखांवर ध्वजवंदन केले. तसेच या वर्षी “राष्ट्र अमृतवर्ष” साजरे करत असताना संस्थेने “राष्ट्र अमृतमहोत्सव” मासिक ठेव व मुदत ठेव या दोन ठेव योजना कार्यान्वीत करून या ठेव योजनेच्या माध्यमातून ठेव ४८८५ खातेदारांकडुन रक्कम रु. १३ कोटी ९४ लाखाहून अधिक ठेव रक्कम जमा आहे, अशा पदधतीने आर्थिक घटकांवर बचतीचे संस्कार घडविण्याचे काम संस्थेने केले आहे. दरम्यान, चिपळूण नागरी सहकारी पतसंस्थेने ३० व्या वर्धापनदिनी १ हजार कोटी ठेवींचा टप्पा पार केला आहे. या सप्टेंबर ते नोव्हेंबर या तिमाहीमध्ये एकूण ठेवीमध्ये ६७ कोटी ७६ लाख रुपयांची वाढ करून सन २०२२-२०२३ या आर्थिक वर्षात एकूण १२७ कोटीने ठेवी व ८० कोटीने कर्जव्यवहार वाढीची संस्थेच्या ३० वर्षाच्या कालखंडातील विक्रमी वाढ झाली आहे. |
याचबरोबर सन २०२१-२०२२ मध्ये उत्कृष्ट कामकाज केलेल्या सहकारी पतसंस्था म्हणून बँको पतसंस्था ब्ल्यू रिबनने सन्मानित केले आहे व सकाळ गृप वतीने आयडॉल ऑफ महाराष्ट्र या अंतर्गत संस्थेच्या मुख्य कार्यकारी अधिकारी सौ. स्वप्ना यादव यांना वूमन इन्फल्यूएन्सर हा पुरस्कार देण्यात आला. याचबरोबर नवभारत ग्रुपच्या नवराष्ट्र वृत्तपत्र समूहाच्या माध्यमातून चिपळूण नागरी सहकारी पतसंस्थेला सन्मानित करण्यात आले. यामुळे संस्थेची यशस्वी वाटचाल होत असल्याचे सिद्ध होत आहे.
यामध्ये आर्थिक वर्ष २०२२-२३ मध्ये महाराष्ट्र राज्याचे माजी सहकार मंत्री बाळासाहेब पाटील, सहकार आयुक्त व निबंधक सहकारी संस्था महाराष्ट्र राज्य, पुणे अनिल कवडे, महाराष्ट्र राज्य सहकारी बँक अध्यक्ष विद्याधर अनास्कर विभागीय सहनिबंधक सह संस्था कोकण भवन, सहाय्यक निबंधक (पतसंस्था) महाराष्ट्र राज्य पुणे राम कुलकर्णी, सहाय्यक निबंधक लेखा परीक्षण, महाराष्ट्र राज्य, पुणे तानाजी कवडे, ज्येष्ठ पत्रकार मधुकर भावे , अप्पर निबंधक (प्रशासन) सहकारी संस्था, महाराष्ट्र राज्य, पुणे श्री. कोतमिरे, निवृत्त अप्पर आयुक्त तथा सहसचिव सहकार व पणन वस्त्रोद्योग मंत्रालय, मुंबई एस. बी. पाटील, जिल्हा उपनिबंधक सह संस्था, रत्नागिरी डॉ. सोपान शिंदे या सर्वांनी संस्थेला भेट देत संस्थेच्या यशस्वी वाटचालीचे कौतुक केले आहे.
या यशस्वी वाटचालीसाठी चिपळूण नागरी सहकारी पतसंस्थेचे संस्थापक अध्यक्ष सुभाषराव चव्हाण यांच्या नेतृत्वाखाली मुख्य कार्यकारी अधिकारी सौ. स्वप्ना यादव यांच्या मार्गदर्शनाखाली अन्य अधिकारी व कर्मचारी वर्ग मेहनत घेत आहेत . चिपळूण नागरी सहकारी पतसंस्था नियोजित कामकाज पूर्ण करताना विविध उपक्रम घेत असते अशाच प्रकारे पूढील वर्षाचे नियोजन करताना सन २०२२-२३ चा संकल्पपुर्ती आनंद मेळावा व या आर्थिक वर्षातील पहिला ग्राहक मेळावा आयोजनाचे ठरविलेले आहे. सदर मेळाव्याला व्हिजन २०२४ चे संकल्पचित्राचे अनावरण करणेत येणार आहे तरी सर्व सभासद, ग्राहक व समन्वयक यांनी सदर मेळाव्याला उपस्थित राहावे असे आवाहन करणेत येत आहे.
