एसटी महामंडळात सुमारे १४ हजार पदांची पारदर्शक भरती; तरुणांची फसवणूक करणाऱ्यांवर कडक कारवाईचे परिवहन मंत्र्यांचे निर्देश
मुंबई: महाराष्ट्र राज्य मार्ग परिवहन (एसटी) महामंडळात लवकरच सुमारे १३ हजार ९८० चालक आणि यांत्रिकी कर्मचाऱ्यांची कंत्राटी पद्धतीने भरती प्रक्रिया राबविण्यात येणार आहे. ही संपूर्ण भरती प्रक्रिया अत्यंत पारदर्शकपणे आणि उमेदवारांच्या हिताचे रक्षण करूनच पार पाडावी, असे स्पष्ट निर्देश परिवहन मंत्री प्रताप सरनाईक यांनी आज मंत्रालयात झालेल्या आढावा बैठकीत दिले. एसटी प्रशासन आणि सर्वसामान्य वाचकांचा विश्वास अधिक दृढ करणारा हा महत्त्वपूर्ण निर्णय ठरला आहे.
आज मंत्रालयात एसटी महामंडळाच्या विविध कामांचा आढावा घेण्यासाठी वरिष्ठ अधिकाऱ्यांची विशेष बैठक आयोजित करण्यात आली होती. यावेळी बोलताना मंत्री सरनाईक यांनी भरती प्रक्रियेच्या गुणवत्तेवर भर दिला. बाह्य संस्थेमार्फत होणारी उमेदवारांची निवड एसटी महामंडळाने ठरवून दिलेल्या पात्रता निकषांनुसारच व्हावी, याची विशेष दक्षता घेण्याचे आदेश त्यांनी दिले. या प्रक्रियेत कोणत्याही उमेदवाराची फसवणूक होणार नाही, याची संपूर्ण जबाबदारी एसटी प्रशासनाने घ्यावी, असेही त्यांनी स्पष्ट केले.
दरम्यान, एसटी महामंडळाच्या नावाचा गैरवापर करून काही खासगी संस्था गरजू तरुणांना नोकरीचे आमिष दाखवत असल्याचे निदर्शनास आले आहे. या प्रकारांची गंभीर दखल घेत, महामंडळाची प्रतिमा जपण्यासाठी आणि तरुणांची आर्थिक फसवणूक रोखण्यासाठी तातडीने पावले उचलण्याच्या सूचना देण्यात आल्या आहेत. सुरक्षा व दक्षता विभागामार्फत अशा गैरप्रकारांची सखोल चौकशी करून दोषी संस्था व व्यक्तींविरुद्ध तात्काळ गुन्हे दाखल करण्याचे निर्देश त्यांनी दिले.
“भरती प्रक्रियेच्या नावाखाली बेरोजगार तरुणांची आर्थिक लूट करणाऱ्यांची गय केली जाणार नाही. या प्रक्रियेत पारदर्शकता आणि विश्वासार्हता राखून उमेदवारांच्या हिताला सर्वोच्च प्राधान्य देण्यासाठी प्रशासन कटिबद्ध आहे,” असा विश्वासही या बैठकीच्या निमित्ताने व्यक्त करण्यात आला.
