पाचगावातील तिघे गंडले!

बंदुकीच्या धाकावर दहशत माजवणारे ताब्यात; सहा लाखांहून अधिक मुद्देमाल जप्त

क्राईम NEWS | TEAM Positivewatch

गणेशोत्सवाच्या आगमनाच्या पार्श्वभूमीवर कोल्हापूर जिल्ह्यातील कायदा व सुव्यवस्था अबाधित ठेवण्यासाठी पोलिसांची कडक हालचाल सुरू आहे. आणि या दक्षतेमुळेच पाचगावात बंदुकीचा धाक दाखवून धमकावणाऱ्या तिघांचा खेळ अखेर संपला.स्थानिक गुन्हे अन्वेषण शाखेच्या पोलिसांनी सापळा रचून रणजित राजाराम गवळी, चेतन गवळी आणि अरुण मोरे या तिघांना पकडले. त्यांच्या ताब्यातून विनापरवाना सिंगल बोअर बंदूक, जिवंत काडतुसे, दुचाकी व वॅगन-आर कार असा तब्बल ६ लाख १५ हजार ५०० रुपयांचा मुद्देमाल जप्त करण्यात आला आहे.

काय घडलं होतं?

गणपती आगमन मिरवणुकीदरम्यान किरकोळ वादानंतर या टोळक्याने ऋषिकेश भोसले याला डोक्याला बंदूक लावून “आता जिवंत सोडत नाही” अशी धमकी दिली. या घटनेने गावभर दहशत पसरली होती. मात्र तक्रार मिळताच करवीर पोलिसांनी तातडीने गुन्हा दाखल केला आणि स्थानिक गुन्हे अन्वेषण शाखेने नेमकी कारवाई करत आरोपींना ताब्यात घेतलं.

पोलिसांचा धडाका

ही कारवाई  पोलिस अधीक्षक योगेश कुमार आणि अपर पोलिस अधीक्षक डॉ. बी. धीरज कुमार यांच्या मार्गदर्शनाखाली करण्यात आली. यात पोलिस निरीक्षक रविंद्र कळमकर, उपनिरीक्षक शेष मोरे तसेच सत्यजित तानुगडे, प्रविण पाटील, दिपक घोरपडे, अरविंद पाटील यांनी विशेष भूमिका बजावली.

संदेश स्पष्ट आहे

गुन्हेगारांनी कोल्हापुरात कायदा हातात घेण्याचा प्रयत्न केला, तर पोलिस त्यांना शाबूत ठेवणार नाहीत. गणेशोत्सव, निवडणुका किंवा कोणतेही सण—कायद्याच्या विरोधात जाणाऱ्यांवर कठोर कारवाई होणारच.  ही मोहीम नागरिकांच्या सुरक्षेसाठी आणि समाजात विश्वास निर्माण करण्यासाठीच आहे असे  या कारवाईनंतर पाेलीस निरीक्षक रविंद्र कळमकर यांनी स्पष्ट केले.

Positivewatch चा ठाम निष्कर्ष:
पोलिसांच्या या कारवाईने नागरिकांना दिलासा आणि गुन्हेगारांना चपराक दिली आहे. “कायद्याशी खेळायचा प्रयत्न केलात, तर खेळ संपलाच समजा!”