विद्यार्थ्यांचे सर्व स्तरातून कौतुक, महाविद्यालयाचा वाढता लौकिक अधोरेखित
कडगाव (प्रतिनिधी) – युवा ग्रामीण विकास संस्था संचलित श्री. आनंदराव आबिटकर कला, वाणिज्य व विज्ञान महाविद्यालय, कडगाव येथील विद्यार्थ्यांनी पुन्हा एकदा आपल्या कर्तृत्वाची छाप पाडत एनसीसी क्षेत्रात उल्लेखनीय यश संपादन केले आहे. महाविद्यालयातील शाहूराजे शिवाजीराव जाधव व समर्थ दयानंद लाडेगावकर या दोन होतकरू विद्यार्थ्यांची एनसीसीच्या जिल्हास्तरीय फायरिंग कॅम्पसाठी निवड झाली आहे.
या निवडीमुळे महाविद्यालयाच्या गुणवत्तापूर्ण शिक्षणासोबतच विद्यार्थ्यांच्या सर्वांगीण विकासावर दिल्या जाणाऱ्या भराची पुन्हा एकदा प्रचिती आली असून परिसरात समाधानाचे वातावरण आहे. विशेष म्हणजे, ग्रामीण भागातील विद्यार्थ्यांनी अशा स्पर्धात्मक व कौशल्याधारित उपक्रमांमध्ये यश मिळवणे ही अभिमानास्पद बाब मानली जात आहे. महाविद्यालयाचे प्राचार्य गुरुप्रसाद शेणवी यांनी या यशाबद्दल समाधान व्यक्त करताना सांगितले की, “विद्यार्थ्यांनी केवळ शैक्षणिक क्षेत्रापुरते मर्यादित न राहता एनसीसीसारख्या शिस्तबद्ध आणि साहसी उपक्रमांमध्ये सहभाग घेतल्यास त्यांच्या व्यक्तिमत्त्वाचा सर्वांगीण विकास होतो. फायरिंग कॅम्पसारख्या उपक्रमांमुळे आत्मविश्वास, एकाग्रता आणि नेतृत्वगुण विकसित होण्यास मोठी मदत होते.”
या उल्लेखनीय यशामागे संस्थेचे अध्यक्ष प्राचार्य अर्जुन आबिटकर यांचे मार्गदर्शन, संस्था मार्गदर्शक प्रा. मिलिंद पांगिरेकर व अवधूत परुळेकर यांची प्रेरणा तसेच एनसीसी प्रमुख आकाश देसाई यांचे नियोजनबद्ध प्रशिक्षण यांचा मोठा वाटा असल्याचे सांगण्यात आले. महाविद्यालयात एनसीसी, क्रीडा व विविध स्पर्धात्मक उपक्रमांना प्रोत्साहन देण्याची परंपरा असून विद्यार्थ्यांना आवश्यक सुविधा व मार्गदर्शन दिले जाते. त्यामुळेच येथील विद्यार्थी जिल्हा व राज्यस्तरावर सातत्याने यश संपादन करत आहेत. या यशस्वी विद्यार्थ्यांचे संस्थेचे सर्व पदाधिकारी, प्राध्यापक, कर्मचारी तसेच पालकवर्गाकडून अभिनंदन करण्यात येत असून त्यांच्या पुढील वाटचालीस शुभेच्छांचा वर्षाव होत आहे. ग्रामीण भागातून उगवणाऱ्या प्रतिभेला मिळालेल्या या यशामुळे महाविद्यालयाच्या नावलौकिकात आणखी भर पडली आहे.
