GOOD NEWS मुंबै महोत्सवा’च्या वेबसाईटचे अनावरण जीवनाधारचे सामाजिक कार्य गौरवास्पद: खा. सावंत

३१ डिसेंबर ते ४ जानेवारी या कालावधीत जीवनाधार फाऊण्डेशनच्या वतीने होणार्‍या ७ व्या ‘मुंबै महोत्सवा’च्या वेबसाईटचे अनावरण खा. सावंत यांच्या हस्ते करण्यात आले. जीवनाधार फाऊण्डेशनचे अध्यक्ष राजेश खाडे, सचिव अनिता खाडे, रंगकर्मी व मुंबै महोत्सवाचे क्रिएटीव्ह हेड श्रीनिवास नार्वेकर, नाट्यनिर्मात्या व समाजमाध्यम समन्वयक सुप्रिया चव्हाण, हेमंत वीर उपस्थित होते.

वेगवेगळ्या क्षेत्रांत उल्लेखनीय कार्य करणार्‍या १९ व्यक्तींना ‘मुंबै गौरव सन्मान’ देऊन सन्मानित करण्यात येणार आहे, तर मुंबै भूषण, मुलखावेगळी माणसं, संस्थात्मक पातळीवर महत्वपूर्ण कार्य करणार्‍या संस्थेस सामाजिक कृतज्ञता सन्मान आणि ‘जीवनाधार जीवनगौरव सन्मान’ देऊन गौरवण्यात येणार आहे. ‘मुंबै महोत्सवा’चे वेगळेपण जपण्याचा आमचा नेहमीच प्रयत्न राहीला आहे. यावेळी त्यामध्ये अधिक वेगळेपणा आणण्याचा प्रयत्न आम्ही केला आहे, असे अध्यक्ष राजेश खाडे म्हणाले.

या वर्षी २ ते ४ जानेवारी या कालावधीत होणार्‍या पुरस्कार वितरण कार्यक्रमांव्यतिरिक्त ‘मुंबै सायक्लोथॉन’ ही पर्यावरणपूरक सायकल रॅली होणार आहे. ‘आगळावेगळा जोडी विशेष मराठमोळा पारंपरिक फॅशन शो’ हे या महोत्सवाचे वैशिष्ट्य आहे. ४१ वाद्ये आणि ४२ कलाकारांचा सामावेश असलेला ‘नाद’ हा फ्युजन बॅण्ड, लावणी कलाप्रकारातल्या बदलत्या भाषेचा आढावा घेणारा ‘ये लावणीचे बोल कौतुके’ आणि मराठमोळा ‘मराठी पाऊल पडते पुढे’ या वेगळ्या सांस्कृतिक कार्यक्रमांचा यामध्ये सामावेश आहे.

‘मुंबै महोत्सवा’मध्ये होणार्‍या सायक्लोथॉन व फॅशन शोबद्दल अधिक माहिती www.mumbaimahotsav.com या वेबसाईटवर मिळेल, असे आयोजकांनी म्हटले आहे.