|
कोल्हापूर: विजयादशमीच्या निमित्ताने ऐतिहासिक दसरा चौकात कोल्हापूरचा शाही दसरा उत्सव मोठ्या उत्साहात आणि राजेशाही थाटात पार पडला. म्हैसूरनंतर देशातील हा सर्वात मोठा दसरा मानला जातो. या सोहळ्याने करवीरवासीयांच्या आनंदाला उधाण आणले होते. प्रमुख ठळक मुद्दे:
उत्सवाच्या या नेत्रदीपक सोहळ्याला प्रशासकीय अधिकारी, मानकरी आणि विविध क्षेत्रातील मान्यवर मोठ्या संख्येने उपस्थित होते. जिल्हा व पोलीस प्रशासनाकडून या संपूर्ण कार्यक्रमाचे उत्तम नियोजन करण्यात आले होते.
|
||
|
कोल्हापूर: विजयादशमीच्या निमित्ताने कोल्हापूरच्या ऐतिहासिक दसरा चौकात आज मावळत्या सूर्याच्या साक्षीने शाही दसरा उत्सव मोठ्या उत्साहात आणि राजेशाही थाटात पार पडला. कर्नाटक राज्यातील म्हैसूरनंतर देशातील हा सर्वात मोठा आणि ऐतिहासिक परंपरा लाभलेला दसरा उत्सव कोल्हापूरवासीयांसाठी अभिमानाचा व आनंदाचा क्षण ठरला. सोने लुटण्याच्या कार्यक्रमासाठी हजारोंच्या संख्येने उपस्थित असलेल्या करवीरवासीयांनी अभूतपूर्व उत्साह दाखवला. “सोनं घ्या… सोन्यासारखं रहा” अशा शुभेच्छा देत आपट्याची पाने एकमेकांना वाटून हा सोहळा अत्यंत उत्साहात साजरा करण्यात आला. राजेशाही थाट आणि सांस्कृतिक परंपरेचा संगमकोल्हापूरच्या शाही दसरा उत्सवाला प्रमुख राज्य उत्सवाचा दर्जा प्राप्त झाला आहे. गेल्या नऊ-दहा दिवसांपासून जिल्हा प्रशासनाच्या वतीने आयोजित विविध सांस्कृतिक कार्यक्रम आणि उपक्रम शहरात उत्साहात पार पडले. विजयादशमी निमित्ताने दसरा चौकात पारंपरिक पद्धतीने शमी पूजनाचा कार्यक्रम शाही थाटात संपन्न झाला. करवीर निवासिनी अंबाबाई आणि तुळजाभवानीच्या पालख्या, भालदार, चोपदार, घोडेस्वार आणि शाही लवाजम्यासह निघालेली मिरवणूक कोल्हापूरच्या समृद्ध लोकसंस्कृतीचे दर्शन घडवणारी ठरली. या मिरवणुकीदरम्यान मार्गावर दोन्ही बाजूंनी पुष्पवृष्टी करत नागरिकांनी या सोहळ्यात सहभाग नोंदवला. भवानी मंडप ते दसरा चौक या मार्गावरील या राजेशाही मिरवणुकीत मावळ्यांच्या वेशभूषेतील घोडेस्वार, धनगरी ढोल, महिलांचे लेझीम, रणमर्द मावळ्यांचे पथक आणि पोवाड्यांनी उपस्थितांचे मन जिंकले. यावेळी रस्त्याच्या दुतर्फा एनसीसी व स्काऊट गाईडच्या विद्यार्थिनी उपस्थित होत्या. जिल्हा व पोलीस प्रशासनाने या संपूर्ण मिरवणुकीचे उत्तम नियोजन केले होते.
राजघराण्याची उपस्थिती आणि शाही सलामीसायंकाळी सहाच्या सुमारास न्यू पॅलेस येथून गाड्यांच्या ताफ्यासह मेबॅक मोटारीतून खासदार शाहू महाराज, माजी खासदार युवराज संभाजीराजे छत्रपती, माजी आमदार युवराज मालोजीराजे, शहाजीराजे आणि यशराजे यांचे दसरा चौकात आगमन झाले. उपस्थित करवीरवासीयांनी टाळ्यांच्या कडकडाटात त्यांचे स्वागत केले. भालदारांनी ललकारी देत सलामी दिली, तर पोलिस बँडच्या तालावर करवीर संस्थानचे मानगीत गायले गेले. त्यानंतर सरदार आणि मानकऱ्यांचे मुजरे स्वीकारत खासदार शाहू महाराजांसह राजघराण्यातील इतर सदस्य मंचावर स्थानापन्न झाले. शमी पूजन आणि सोने लूटदसरा महोत्सव समितीच्या वतीने राजघराण्यातील सदस्यांचे स्वागत करण्यात आले. राजपुरोहितांच्या पौरोहित्याखाली शमी पूजनाचा विधी पार पडला. यानंतर बंदुकीच्या फैरी झाडून अंबाबाईला सलामी देण्यात आली. सोने लुटण्याचा कार्यक्रम या सोहळ्याचा मुख्य कळस ठरला. यावेळी करवीरवासीयांची अक्षरशः झुंबड उडाली. लुटलेले सोने घेऊन राजघराण्यातील सदस्यांना देण्यासाठी नागरिकांनी मोठी गर्दी केली. “सोनं घ्या… सोन्यासारखं रहा” अशा शुभेच्छांची देवाणघेवाण करत हा उत्सव मोठ्या श्रद्धेने व उत्साहात साजरा झाला. या शाही सोहळ्याला खासदार धनंजय महाडीक,आमदार सतेज पाटील,महापौर रूपाराणी निकम,कोल्हापूर परिक्षेत्राचे विशेष पोलीस महानिरिक्षक रंजनकुमार शर्मा, कुलगुरु राजनीश कामत, जिल्हाधिकारी डॉ विजय राठोड, महापालिका आयुक्त डॉ राजेंद्र भारूड,पोलीस अधीक्षक निलोत्पल,अपर जिल्हाधिकारी अजय पवार ,प्र.कुलगुरु प्रा.डॉ. ज्योती जाधव,वैद्यकीय अधिष्ठता डॉ.सदानंद भिसे,जिल्हा शल्य चिकित्सक डॉ सरिता थोरात यांच्यासह कला,क्रीडा,उद्योग, नाटय,शिक्षण,प्रशासन क्षेत्रातील मान्यवर तसेच सरदार,इनामदार घराण्यातील प्रमुख मानकरी आणि वरिष्ठ अधिकारी उपस्थित होते.
|
