|
माजी आमदार राजेश पाटील व डाॅ. नंदाताई बाभुळकर यांच्यात समझोता
मंत्री हसन मुश्रीफ यांच्या नेतृत्वाखाली विजयाच्या आणा
घड्याळावर एकजूट! गडहिंग्लज–चंदगड–आजऱ्यात दोन्ही राष्ट्रवादी एकत्र; हसन मुश्रीफ यांच्या नेतृत्वाखाली निवडणूक रणशिंग
कोल्हापूर: गडहिंग्लजसह चंदगड व आजरा तालुक्यात जिल्हा परिषद व पंचायत समितीच्या जागांवर दोन्ही राष्ट्रवादी काँग्रेस घड्याळ चिन्हावर एकत्र लढणार असल्याचे निश्चित झाले आहे. या संदर्भात माजी आमदार राजेश पाटील व डाॅ. सौ. नंदाताई बाभुळकर यांच्यामध्ये समझोता झाला आहे. या दोन्हीही नेत्यांनी वैद्यकीय शिक्षण मंत्री हसन मुश्रीफ यांच्या नेतृत्वाखाली राष्ट्रवादी पक्षाच्या उमेदवारांच्या विजयाच्या आणाभाका घेतल्या.
कोल्हापुरात मंत्री हसन मुश्रीफ यांची भेट घेऊन माजी आमदार राजेश पाटील व डाॅ. सौ. नंदाताई बाभुळकर यांनी भेटून या निर्णयावर शिक्कामोर्तब केले.
मंत्री हसन मुश्रीफ म्हणाले, गडहिंग्लज, चंदगड व आजरा तालुक्यातील जिल्हा परिषद व पंचायत समिती निवडणुकीसाठी दोन्ही राष्ट्रवादी काँग्रेस एकत्र येत आहेत. हा राज्यातील पहिला प्रयोग आहे. माजी आमदार राजेश पाटील व डाॅ. सौ. नंदाताई बाभुळकर यांचे त्याबद्दल अभिनंदन.
माजी आमदार राजेश पाटील म्हणाले, वैद्यकीय शिक्षण मंत्री हसन मुश्रीफ यांच्या नेतृत्वाखाली मी व डाॅ. सौ. नंदाताई बाबुळकर एकत्र आलो आहोत. आघाडी करून गडहिंग्लज, चंदगड आजरा तालुक्यातील आठ जिल्हा परिषद मतदार संघ व १६ पंचायत समिती मतदार संघात घड्याळ या चिन्हावर उमेदवारांनी लढण्याबाबत एकमत झाले आहे. चंदगड नगरपंचायत निवडणुकीच्या निमित्ताने आम्ही हा पहिला प्रयोग केला होता आणि त्याचे पडसाद संपूर्ण महाराष्ट्रात उमटत आहेत. दोन्हीही राष्ट्रवादी काँग्रेस पक्षानी पुरोगामी विचार विशेषता शाहू महाराज, महात्मा ज्योतिबा फुले आणि डॉ. बाबासाहेब आंबेडकर यांचा विचार या जिल्ह्यात तेवत ठेवला आहे. या निवडणुकीमध्ये राष्ट्रवादी काँग्रेस पक्षाचा झेंडा फडकवू आणि सर्व उमेदवारांना प्रचंड मताधिक्याने विजयी करू.
डॉ. सौ. नंदाताई बाभुळकर म्हणाल्या, महिन्यापूर्वीच चंदगड नगर पंचायतीच्या निमित्ताने दोन्ही राष्ट्रवादी काँग्रेस एकत्र करण्याचा आम्ही पहिल्यांदा प्रयोग केला. त्याला चांगले यशही मिळाले. आमचे नेते शरद पवारसाहेब व प्रदेशाध्यक्ष शशिकांत शिंदे यांची आम्ही अनुमती घेतलेली आहे. आमचे नेते हसनसाहेब मुश्रीफ यांनी याबाबतच्या चर्चा घडवून आणल्या. जिल्हा परिषद पंचायत समिती चांगल्या प्रकारे ताकतवान पॅनल ऊभे केले आहे.
घड्याळ मनामनात घराघरात…..!
डाॅ. सौ. बाभुळकर म्हणाल्या, दोन्ही राष्ट्रवादी काँग्रेस एकत्र लढताना चिन्हाबाबत चर्चा झाली. स्वर्गीय कै. बाबासाहेब कुपेकरसाहेब यांच्यापासून राष्ट्रवादीचे घड्याळ हे चिन्ह जनतेच्या मनामनात आणि घराघरात खोलवर रुजलेले आहे. मी आणि माजी आमदार राजेशदादा पाटील राष्ट्रवादी काँग्रेस म्हणून या निवडणुकांना एकत्रित ताकतीने सामोरे जाऊ.
यावेळी रामराज कुपेकर, उदयराव जोशी, जयसिंग चव्हाण, अभय देसाई, एस. एन. पाटील, विजयराव गुरव, रामचंद्र गायकवाड आदी प्रमुख उपस्थित होते.
मतदारसंघनिहाय जिल्हा परिषद व पंचायत समिती मतदार संघाचे उमेदवार असे…..
- गडहिंग्लज तालुका- नुल जिल्हा परिषद – तेजस्विनी पाटील, नुल पंचायत समिती – शिवगोंडा पाटील, हसुर चंपू पंचायत समिती- श्रीमती प्रभावती बागी. हलकर्णी जिल्हा परिषद -शिवशंकर हत्तरकी, हलकर्णी पंचायत समिती- अनिल देसाई, बसर्गे पंचायत समिती – रूपा केसरोळी. महागाव जिल्हा परिषद – अमरसिंह चव्हाण, महागाव पंचायत समिती- डॉ.प्रतिभा चव्हाण, भडगाव पंचायत समिती- शिवाजी करीगार. नेसरी जिल्हा परिषद- संग्रामसिंह कुपेकर, नेसरी पंचायत समिती- अमर हिडदुगी, हडलगे पंचायत समिती- स्नेहल जाधव.
चंदगड तालुका- अडकुर जि-प- सौ. अलकनंदा अंबादास पाटील, अडकूर पं.स. श्री. हणमंतराव दत्ताजीराव देसाई, गवसे- सौ. रेणुका दिपक कांबळे. माणगाव जिल्हा परिषद – कु. माणसी कालाप्पा भोगम. माणगाव प.सः – श्री विलास नाईक, कोवाड पं.स.- सौ गिता बामणे. कुदनुर जि.प. सौ. विद्या विलास पाटील. कुदनुर प.स.-श्री मधुकर आंबेवाडकर. तुर्केवाडी पं.स – श्री पांडुरंग कृष्णा बेणके. तुडिये जिपः- सौ. रचना राहुल गावडे, तुडीये पं.स. – सौ. प्रेमा जगन्नाथ हुलजी, हेरे पं.स.-सौ. संज्योती संतोष मळवीकर.
- आजरा तालुका- पेरणोली जि प – श्री सुधीर राजाराम देसाई, पेरणोली पं.स. – सौ. यशोदा युवराज पोवार, वाटंगी पं. सं.- श्री. राजाराम गुणाजी होलम.
- वैद्यकीय शिक्षण मंत्री हसन मुश्रीफ यांच्या नेतृत्वाखाली गडहिंग्लज, चंदगड व आजरा तालुक्यातील आठ जिल्हा परिषद व १६ पंचायत समिती मतदार संघांमध्ये दोन्ही राष्ट्रवादी काँग्रेसने घड्याळ चिन्हावर एकत्र लढण्याचा निर्णय घेतला. यावेळी मंत्री श्री. मुश्रीफ यांच्यासह माजी आमदार राजेश पाटील, डॉ. सौ नंदाताई बाभुळकर, रामराज कुपेकर व प्रमुख मान्यवर.
|
