गोकुळकडून दरफरक, व्याज, डिबेंचर्स व डिव्हिडंड अशा सर्व घटकांचा विचार करून दरफरक वाटप निश्चित
कोल्हापूर – गोकुळ दूध संघाकडून यंदा दिवाळीपूर्वी दूध उत्पादकांना तब्बल १३६ कोटी ०३ लाख रुपये अंतिम दूध दरफरक म्हणून दिले जाणार आहेत. हा दरफरक थेट प्राथमिक दूध संस्थांच्या बँक खात्यावर दि. १ ऑक्टोबर रोजी जमा होणार असून, या निर्णयामुळे जिल्ह्यातील सुमारे पाच लाख दूध उत्पादक सभासदांना दिवाळीपूर्वी आनंदाची भेट मिळणार आहे. ही रक्कम गतवर्षीपेक्षा २२ कोटी ३७ लाख रुपये जादा आहे.
गोकुळचे चेअरमन नविद मुश्रीफ यांनी आज पत्रकार परिषदेत ही माहिती दिली. त्यांनी सांगितले की, “दूध उत्पादक शेतकरी हा गोकुळच्या कार्याचा केंद्रबिंदू आहे. त्यांच्या श्रमांचा योग्य मोबदला देणे ही आमची जबाबदारी आहे. त्यामुळेच दरवर्षीप्रमाणे यंदाही दिवाळीपूर्वी दरफरकाची मोठी रक्कम आम्ही उत्पादकांच्या खात्यात जमा करणार आहोत.” आर्थिक वर्ष २०२४-२५ मध्ये म्हैस दुधाला प्रतिलिटर २ रुपये ४५ पैसे तर गायीच्या दुधाला प्रतिलिटर १ रुपये ४५ पैसे असा दरफरक दिला जाणार आहे. त्यासोबतच दूध संस्थांसाठी प्रतिलिटर १ रुपये २५ पैसे डिबेंचर्स स्वरूपात जमा केले जातील. तसेच हीरक महोत्सवी जादा दरफरक म्हणून म्हैस व गाय दुधाला प्रतिलिटर २० पैसे अतिरिक्त देण्यात आले आहेत.
गेल्या वर्षीप्रमाणे यंदाही गोकुळने दरफरक, व्याज, डिबेंचर्स व डिव्हिडंड अशा सर्व घटकांचा विचार करून १३६ कोटी ०३ लाख रुपये वाटप निश्चित केले आहे. त्यामध्ये म्हैस दुधाकरिता ६६ कोटी ३७ लाख रुपये, गायीच्या दुधाकरिता ४५ कोटी १४ लाख रुपये, व्याज व डिबेंचर्सवरचे उत्पन्न मिळून ही रक्कम झाली आहे. गोकुळच्या या निर्णयाचा फायदा कोल्हापूर जिल्ह्यासह सीमा भागातील ८ हजार १२ दूध संस्थांना होणार आहे. दरफरकाबरोबरच गोकुळने चालू वर्षात ४२ कोटी रुपये पशुवैद्यकीय सेवा, कृत्रिम रेतन, वैरण विकास, संगोपन अनुदान, शैक्षणिक सहली, किसान विमा, मिल्को टेस्टर व कॉम्प्युटर खरेदी अशा विविध योजनांवर खर्च केले आहेत.
गोकुळचे दैनिक दूध संकलन १८.५९ लाख लिटरवर गेले असून, एका दिवसात विक्रमी २३.६३ लाख लिटर दूध विक्रीचा उच्चांक गाठला आहे. आर्थिक वर्ष २०२४-२५ मध्ये म्हैस दूध उत्पादकांना प्रतिलिटर ६० रुपये ४८ पैसे आणि गायीच्या दूध उत्पादकांना प्रतिलिटर ३६ रुपये ८४ पैसे इतका उच्चांकी दर मिळाल्याचे मुश्रीफ यांनी स्पष्ट केले. “भविष्यात म्हैस दूध संकलन वाढवण्यासाठी जातिवंत म्हैस खरेदी योजनेत अधिकाधिक उत्पादकांनी सहभागी व्हावे,” असे आवाहन करताना चेअरमन मुश्रीफ यांनी सर्व सभासद, ग्राहक, वितरक व कर्मचारी यांना विजयादशमी व दिवाळीच्या शुभेच्छा दिल्या. या वेळी माजी चेअरमन विश्वास पाटील, अरुण डोंगळे, संचालक बाबासाहेब चौगले, शशिकांत पाटील-चुयेकर, किसन चौगले, रणजितसिंह पाटील, संभाजी पाटील, प्रकाश पाटील, सुजित मिणचेकर, बाळासो खाडे, मुरलीधर जाधव, कार्यकारी संचालक डॉ. योगेश गोडबोले आदी उपस्थित होते.
